Indi nangin upang sa Boston Celtics ang wala paghampang ni Jayson Tatum agud patumbahon ang Detroit Pistons sa iskor nga 130 – 120.
Nagkamada sang double-digit scores ang anom nga player sang Boston sa pagpanguna nanday Jaylen Brown kag Kristaps Porzingis. 28 points naman ang ginpasulod ni Brown kalakip ang siyam nga assists samtang 26 points naman ang nabulsa ni Porzingis kalakip ang siyam nga rebounds.
Ang guard nga si Derrick White ang nag-amot man sang double-double – 14 pts, 11 assists sa kadalag-an sang Boston.
Sa bahin sang Pistons, halos magbulsa sang isa ka triple-double ang bataon nga si Cade Cunningham kag maghimo sang 27 points, 14 assists kag siyam nga rebounds.
Duha man sa iya nga teammate ang nakakuha sang masobra 20 pts: 27 points ang kontribusyon ni Tobias Harris samtang 23 points naman ang amot ni Malik Beasley.
Apisar defending champion ang kasumpong nga Celtics, nakigsabayan sa gihapon ang Pistons sa opensa kag nalab-ot ang 51.2% overall shooting percentage. Mas manubo diri ang nahimo sang Boston nga may ara lamang sang 47.9%
Sa 3-point arc, nalapawan pa sang Pistons ang defending champion: bangud nagpasulod ang Detroit sang 20 3-pointers gikan sa 39 attempts samtang 21 ang nahimo sang Boston gikan sa 53 attempts.
Sa pihak sini, abanse ang Boston sa depensa matapos ini nga mag-agaw sang 43 rebounds, samtang 34 lamang ang ginsabat sang Pistons.
Mas madamo man nga turnover ang nahimo sang Detroit sa kabug-usan sang hampang nga tuman naman nga ginhingalitan sang 2024 NBA Champion.
