Naghimo sang statement ang NBA defending champion Boston Celtics sa opening sang NBA 2024-2025 season matapos sini nga tambakan ang New York Knicks sang 23 big points, rason agud ibulsa sang Celtics ang pinaka-una nga kadalag-an sa regular season.
Sa una nga quarter pa lamang, nagbubo na ang Celtics sang 43 points samtang 24 points lamang ang nakaya nga ibalos sang Knicks.
Napabilin sang Celtics ang 19 points nga lamang sini sa kabug-usan sang 1st half kag nadugangan pa ini sa pagtakup sang 3rd quarter kag umabot sa 26 points.
Napaslawan ang Knicks nga makalagas pa bag-o magtakop ang hampang sa score nga 132 – 109.
Isa nga double-double performance ang ginpakita ni Celtics forward Jayson Tatum nga nakapuntos sang 37 points kag pulo nga assists.
Nag-ambag naman sang 23 points kag pito nga rebound si 2024 Finals MVP Jaylen Brown samtang solid naman nga 24 points ang kontribusyon ni Derrick White.
Sa bahin sang Knicks, kapwa nagbuhos sang tig 22 points sanday Jalen Brunson kag bench Miles McBride.
Ginlimitahan lamang sa 12 points ang bag-o nga sentro sang grupo nga si Karl-Anthony Towns, kaupod ang pito nga rebounds sa iya una nga regular season game bilang Knicks.
Nahimo sang Boston ang nasambit nga kadalag-an sa pihak sang 55.1% nga episyente nga shooting sang Knicks. Ang Boston ang nangin champion sang 2024 NBA Finals matapos mapaslawan ang Dallas Mavericks sa sulod sang lima nga game.
