ROXAS CITY – Arestado ang isa ka miyembro sang Barangay Peacekeeping Action Team (BPAT) sa Barangay Pinamalatican, Sigma, Capiz matapos ginluthang ang ginaalegar karelasyon sang iya nga misis sa nasambit nga lugar.
Suno kay Police Executive Master Seargent Jolito Magbanua, Deputy Chief of Police sang Sigma Municipal Police Station, nakaaresto sa karon kag natalana nga pasakaan sang panumbungon ang suspek nga si George Durana, 58 anyos.
Base sa inisyal nga imbestigasyon, papuli na ang biktima nga si Jose Ronnie Luche, 38 anyos gikan sa isa ka binaylehan sa nasambit nga barangay sang ginsundan ini sang suspek kag ginluthang.
Suno pa kay Magbanua, may daan na nga hiligut-anon ang duha sa Barangay Matinabus, sa nasambit man nga banwa kun sa diin ginhaboy sang bote sang suspek ang biktima.
Ginapatihan nga pagpangimon ang motibo sang suspek sa pagluthang sa biktima bangud nagaduda si Durana nga may relasyon ang iya misis kag si Luche.
Gilayon nga ginpadangat sa ospital ang biktima agud madapatan sang nagakaigo nga pagbulong samtang naaresto ang suspek sa ginkasa nga hot pursuit operation sang mga pulis.
