Ginpanginwala ni Barangay Kagawad Loreto Morales kaupod ang pila ka opisyales sang Barangay Santa Fe sa banwa sang Pilar ang alegasyon nga pagpang-harass kag pagpamahog nga ginahaboy batuk sa ila.
Sa interview sang Bombo Radyo kay Morales, ginpahayag sini nga nagpadulong lamang ini kaupod ang iya BPAT bangud may nabaton ini nga report nga may gaginahod kag gavideoke sa lugar nga kun sa diin nagahiwat sang pagkinasadya ang nagreklamo nga si Jennifer Ardena.
Dugang pa sini, bilang gintalaga nga peace and order committee, obligasyon sini nga ipabilin nga malinong kag matawhay ang ila lugar.
Gin-athag man ni Morales kag mga kaupdanan sini nga wala ini sila nagpamahog, wala sang pagpang-harass nga natabo kag pila pa sini ka bes nga ginhinyo nga kun mahimo hinayon ang patunog sang nagreklamo nga si Jennifer Ardena.
Apang, suno naman sa Barangay Secretary sang amo nga barangay, damo na suno diri sang nagareklamo kag nagapadulong sa ila talatapan bangud sa asud-asud na nga pag-videoke sa lugar nga kun sa diin ginapahayag sang mga nagareklamo nga pumuluyo nga tuman na nga naka-istorbo sa kadam-an.
Dugang pa sini, gin-istorya naman suno diri sang punong barangay ang mga ginareklamo nga sanday Ardeña kag mga kaupdanan sini apang wala sa gihapon ang mga ini nagapamati.
Dugang pa sang mga opisyale, wala ini sila nagapamalabag sa ila pagkinasadya kag pagkinalipay, ang ginapunto lang sang mga ini nga kun tani indi man ini sila maka-istorbo kag makaapekto sa pila man ka mga pumuluyo sa nasambit nga lugar.
