ROXAS CITY – Pormal na nga ginbuksan sang schools division superintendent sang Roxas City Division ang Brigada Eskwela 2019.
Ginpatigayon ang kick-off ceremony sa Don Ynocencio del Rosario National Highschool sa Barangay Dayao, Roxas City sa diin gin-updan sang mga manunudlo, stakeholders, magkatuhay nga ahensiya sang gobyerno, ginikanan kag mga estudyante nga tuyo matinluan ang eskwelahan kag mga hulot klasehan agud mangin preparado ini sa pagbukas sang klase.
Ginpasalamatan ni Dr. Feliza Beriong ang mga nagpasakup sa tuigan nga kahiwatan sang Department of Education (DepEd).
Liwat ginpahanumdum sang opisyal ang akto sang boluntarismo kag commitment sang nagaupod sa Brigada Eskwela 2019.
Nasaad pa sa mensahe ni Beriong nga indi balasehan ang kadamuon sang mga salakyan nga nagaupod sa caravan sa pagsugod sang Brigada Eskwela kundi ang matood nga commitment nga matinluan ang palibot sang eskwelahan, ma-repair ang mga bangko ukon lamesa kag mapintahan ang eskwelahan kag mga hulot klasehan, agud sa pagsulod sang mga estudyante pag-abot sang opening of classes diretso na sa paglecture ang mga manunudlo.
Ginpalab-ot man sini sa mga luyag pa magdonar sang kun ano ang ila masarangan nga magpakig-angut lamang sa mga eskwelahan, bangud bukas kamot ini nga batunon sang mga buluthuan ang mga donasyon nga ihatag sa ila nga makabulig sa nasambit nga hilikuton.
