ROXAS CITY – Opisyal na nga ginsuguran subong nga adlaw Hulyo 22, 2024 ang Brigada Eskwela 2024 nga may tema “Bayanihan Para sa Matatag na Paaralan” pinaagi sa Kick-off Ceremony nga ginpatigayon sang DepEd-Capiz Division sa Vicente Andaya National High School sa banwa sang Sigma.
Magluwas sa mga manunudlo, nagpartisipar man sa Kick-off ceremony ang hanay sang Bureau of Fire Protection, Philippine National Police, MDRRMO kag mga LGUs.
Samtang, suno naman kay DepEd-Capiz School Superintendent Dr. Miguel Mac D. Aposin sang mapakig-angutan sang Bombo Radyo, ginpahayag sini nga magalibot man subong nga semana sa mga eskwelahan ang mga supervisors agud mag-monitor sa pagbukas sang klase.
Nagapanawagan man ini sa tanan nga mga stakeholders, mga ginikanan, mga alumni sa eskwelahan kag LGUs nga magbulig agud mapreparar ang mga buluthuan sa pagbukas sang klase.
Dugang pa sini nga welcome man ang tanan nga mga volunteers nga luyag magbulig sa Brigada Eskwela.
