ROXAS CITY – Maayo nga inisyatibo para kay City Mayor Ronnie Dadivas ang ginpapasar sang Sangguniang Panlungsod nga Resolution No. 065-2020 nga ginduso ni City Councilor Albert Gregory Potato.
Ang nasambit nga resolusyon ang nagapatuhoy sa pagpangabay kag pagganyat sa publiko nga maga-dine-in sa mga kalan-an kag iban pa nga food and beverage establishments sa pagdala sang iya kaugalingon nga ‘utensils’ bangud sa pamahog sang coronavirus disease (COVID-19).
Ginpahayag sang alkalde nga isa man ini ka pamaagi agud maamligan ang ikaayong lawas sang mga pumuluyo ilabi na ang mga magakaon sa mga restaurants.
Plano naman sang konseho nga magpapasar sang isa ka ordinansa natuhoy sa nasambit nga resolusyon.
Mahibaluan nga kasunod sa pagpaidalom sa Modified General Community Quarantine (MGCQ) sa probinsiya sang Capiz, ginpahanugutan na ang pagdine-in sa mga food and beverage establishments.
