Ginpakakas na sang Bangko Sentral ng Pilipinas subong nga adlaw, Agosto 14, 2025 sa mga e-wallet platforms ang links sang online gambling sites.
Ini ang ginkumpirma ni Bangko Sentral ng Pilipinas Deputy Governor Mamerto Tangonan sa hearing sang Senate Committee on Games and Amusement.
Suno kay Tangonan, ginhatagan nila sang 48 ka oras agud nga maghulag ang mga e-wallets.
Ginkwestyon ini ni Senador Alan Peter Cayetano, ilabi kag ginasiguro sang Department of Information and Communications Technology (DICT) nga sarang man nga gilayon kakson ang mga link sa kapareho nga adlaw.
Dugang pa sang senador, indi na kinahanglan pa nga hulton ang hearin antes nga magpatuman sang aksyon, kag hugot pa sini nga ginsiling nga bilang regulator sang e-wallets, kinahanglan nga mas madasig ang central bank sa pagpatuman sang mas hugot nga regulasyon batok sa iligal nga online gambling.
Ginsiling man sang BSP nga katuyuan nila nga hatagan sang bastante nga oras ang tanan nga e-wallet operators agud masiguro ang pagkakas sang links kag mapahibalo ini sa publiko.
Apang nanindugan si Cayetano nga mas importante ang gilayon nga aksyon agud malikawan ang dugang nga biktima sang sugal online.
