ROXAS CITY – Ginapanan-aw sang Capiz Schools Division Superintendent nga indi maapektuhan ang finances kag privileges sang mga manunudlo subong nga tuig 2022.
Ini matapos nga ginpasaka sa P50,000 ang procurement sang departamento nagikan sa P15,000 sang nagligad nga tuig,
suno ini kay Dr. Salvador Ochavo, Jr., sang mainterview sang Bombo Radyo.
Dugang pa sini nga dako man ang nabulig sang nagkalain-lain nga alkalde sa probinsya pinaagi sa paggamit sang ila special education fund para sa mga kabataan kag eskwelahan.
Matandaan nga ang Department of Education (DepEd) ang may pinakadako nga alokasyon approved 2022 General Appropriations Act (GAA) nga nagdangat sa P788.5 billion.
Sa pihak nga bahin, ginpahayag ni Ochavo nga nakadepende sa arrangement sang mga school principal ang pagreport sang mga manunudlo sa eskwelahan bangud apisar wala sila sa bulothoan, wala sila nagauntat sa pagtrabaho.
Nagpasalamat ang Capiz Schools Division Superintendent nga ang ila ginhimo nga tikang agud maamligan ang ikaayong lawas sang ila mga estudyante kag manunudlo ang nangin epektibo sang nagligad nga tuig kag padapagayunon subong nga 2022.
