ROXAS CITY – Ginlunsyar na sang Capiz Tourism and Cultural Affairs sang gobyerno probinsyal ang province-wide search para sa Capiz Singing Ambassador, ang ‘Bugal sang Capiz 2021.’
Ini ang ginhpahayag ni Mr. Alfonsus Tesoro, pinuno sang Provincial Tourism and Cultural Affairs Office (PTCAO) sang mainterview sang Bombo Radyo.
Suno diri, tinutuyo sini nga kompetisyon nga makatukib sang bag-o nga abilidad sa pagkanta, subong man mangin ambassador sang probinsya pinaagi sa nasambit nga abilidad, kag ma-promote ang mga folksongs.
Bukas ini sa mga amateur singers nagapang-edaron sa 16 tubtob 60 anyos nga residente sang Capiz kag dapat wala pa makartisipar sa bisan ano nga regional, national ukon international solo singing competition.
Magapili ang kada banwa sang ila representante kag pagahiwaton ini pinaagi sa audition.
Kadam-an sa 16 ka mga kabanwahanan ang magahiwat sang face-to-face audition, samtang sa syudad sang Roxas, pagahiwaton ini online.
Nagahulat naman ang P20,000 nga premyo para sa Grand Winner, P15,000 sa First Runner-Up, P10,000 sa Second Runner-Up kag P3,000 para sa consolation prizes.
Ginaengganyo man ang mga tigpasakop nga magpili sang kanta nga Original Pilipino Music (OPM) ukon mga Filipino Folksongs.
Pagahiwaton ang Finals sa bulan sang Disyembre sini nga tuig.
Yari ang schedule sang auditions sa kada lugar:
September 21 – Dao
October 18 tubtob November 5 – Roxas City
October 18 – Jamindan
October 19 – Dumarao
October 26 – Sapian
October 28 – President Roxas
November 3 – Pilar
November 4 – Panit-an
November 5 – Tapaz
November 6 – Ivisan
November 7 – Dumalag
November 8 – Sigma
November 9 – Mambusao
November 10 – Pontevedra
November 11 – Cuartero
November 12 – Maayon
November 13 – Panay
Magpakig-angut lamang sa talatapan sang inyo City ukon Municipal Tourism para sa dugang nga impormasyon.
