ROXAS CITY – Natalana nga pasakaan sang panumbungon nga paglapas sa Anti-Trafficking in Persons Act ukon RA 9208 ang nagbugaw kag tag-iya sang KTV bar matapos naaresto sa ginpatigayon nga operasyon sang Women and Children Protection Desk (WCPD) sang Roxas City PNP sa Arellano KTV Bar, Arellano Street, sining syudad.
Suno kay Roxas City PNP WCPD Head Police Senior Master Sergeant Rose Olaveja nga sandig sa panaysayon sang biktima nga si Alyas Che-Che diri natigayon nga nadakpan ang suspek nga si Jonifer Panes alyas Jester Ledesma.
Bangud diri, nagapadayon sa karon ang ginapatigayon nga imbestigasyon sa biktima agud makakuha sang pila ka mga ebidensya nga mahimo magamit sa pagfile sang kaso batok kay Panes.
Sa karon yara na sa kostodiya sang pulisya ang bugaw nga si Panes kag ang tag-iya sang KTV bar nga si Alina Alico sang Barangay 3.
Apang wala lamang madakpan ang isa ka ginaalegar bugaw nga si Nita Arisgado.
Nahibaluan nga na-trauma ang 21-anyos nga commercial sex worker sa inagihan sa kamot sang mga kostomer sini sa ginatrabahuan nga Arellano Bar sa Arellano St., sining syudad.
