Ginakabig ni Senador Ping Lacson nga pinaka-notorious ang probinsya sang Bulacan sa mga anomaliya nga flood control projects.
Sa iya privilege speech, ginbuyagyag sang senador ang korapsyon sang duha ka ginpahalin nga district engineers sa Bulacan First Engineering Office nga sanday anay District Engineer Henry Alcantara kag ang nagbulos sa iya nga anay Assistant District Engineer Brice Hernandez.
Suno sa senador, sa pagpamuno sang duha sa nasambit nga talatapan, 28 ka mga proyekto para sa tuig 2024 ang may pareho nga kantidad sang pondo bisan suno sa iya nga magkatuhay ang kadakuon sang mga proyekto nga ipatuman.
Ginreport man nga ang isa sa ila nakadaog sang isa ka gatos ka milyon sa isa ka casino sa Manila.
Ginpakalain man ni Lacson ang kwestyonable nga flood control project sa banwa sang Arayat, Pampanga, matapos liwat nga narumpag ang riverbank mitigation structure sa Candating apisar nga makapila na ka beses nga ginkay-o kag ginpondohan sang gobyerno.
Suno sa report, sang Hulyo 2025 pa lang liwat nga narumpag ang bahin sang estraktura matapos ang pagpangguba sang Bagyo Emong, bisan pa nga ang pinakaulihi nga pagkay-o natapos sang Hunyo sini nga tuig.
Ginpahayag ni Lacson nga ang pondo para sa proyekto nagsugod sang 2018 nga may ₱20 million nga ginpain para sa “construction ukon rehabilitation sang slope protection sa higad sang Pampanga River, Candating Section, Arayat, Pampanga.” Apang, nahalitan ini sang ulihi.
Gikan sa orihinal nga ₱20 milyones sang 2018, ang kabug-usan nga gasto sang amo man nga estraktura sa pagkontrol sang baha naglab-ot na karon sa kapin sa ₱274.8 milyones—ukon isa ka pagdugang sing kapin sa 815% kon ipaanggid sa una nga pagtukod.
Ginsambit man nga ang Eddmari Construction and Trading amo ang regular nga kontraktor sa amo nga proyekto.
Ang kompanya nadalahig na sa nagkalainlain nga mga kontrobersiya, lakip ang pagdula sa listahan bilang isa ka DHSUD builder sang 2023.
Samtang, dugang nga ginbuyagyag sang senador nga 40% lang sang pondo ang nagakadto sa flood control projects.
Sa pagbungkag sang senador, 8-10% ang nagakadto sa mga enhinyero sang distrito, 2-3% ang nagakadto sa kickback sang opisina sang enhinyero sang distrito gikan sa sobra nga ganansya sang kontraktor, 5-6% ang nagakadto sa mga katapo sang Bids and Awards, 0.5-1% ang nagakadto sa Commission on Audit, kag 20-25% ang nagakadto sa mga politiko nga nagpangita sang pondo para sa proyekto.
