Na-detect sang Philippine Institute of Volcanology and Seismology (Phivolcs) ang pila ka panibag-o nga aktibidad sang bulkan Taal.
Base sa advisory nga ginpaguha sang Phivolcs subong nga adlaw, nagpakita ang bulkan sang pagtaas sa seismic activity sini. Suno sa ahensiya, nagakahulugan ini sang potential volcanic activity sa idalom sang bulkan.
Na-rekord sang Taal Volcano Network (TVN) ang kabug-usan 12 volcanic earthquakes humalin sang Enero-1, 2025, kalakip na ang anom ka volcanic tremor.
Natumod man sang TVN ang kadulaan sang degassing plume gikan sa baba sang bulkan, butang nga ginakaalarma sini bangud sa nakaligad nga apat ka tuig, tayuyon ang pagbuga sini sang sulfur dioxide (SO2) ukon asupre. Ang ulihi nga nabalhag nga ginbuga sining asupre ang may kabug-usan nga 2,753 tonelada/kada adlaw.
Ang pagtaas sang mga seimic activity sa bulkan, kalakip na ang gulpi nga pagkadula sang gas emission gikan sa baba sini ang palatandaan nga may nakabara sa volcanic gas pathway ukon baba sang bulkan, isa ka potential situation nga posible magtuga sang steam-driven ukon phreatic eruptions, kag mangin ang mga minor phreatomagmatic events.
Bangud sini, padayon nga ginapreparahan sang Phivolcs ang publiko kag ginapanugyanan ang mga ini nga mangin alerto.
Sa karon, nakataas ang bulkan sa idalom sang Alert Level 1.
