Naka-record sang dugang nga 16 ka volcanic earthquake ang Kanlaon Volcano sa nakaligad nga 24 oras nga monitoring sang Philippine Institute of Volcanology and Seismology (PHIVOLCS).
Magluwas sini, makaduha man ini ka beses nga nagbuga sang madamol nga abo nga naglawig sang 43 tubtob 49 ka minutos. Kadungan sini, nakabuga man sang 3984 ka tonelada sang sulfur dioxide ang Kanlaon.
Matalupangdan man ang padayon nga paghubag sang Bulkan kun sa diin ang PHIVOLCS naka-record man sang anum ka volcanic tremors nga posible patimaan sang posible nga nagahilapit nga paglupok gikan sa bulkan.
Nagapabilin nga mataas ang Alert Level 3 sa bulkan bangud sa nagapadayon nga aktibidad sini.
Samtang ginadumilian sa gihapon ang paglupad sang anuman nga sahi sang eroplano malapit sa crater sang Kanlaon kag ang pagsulod sa radius nga anum tubtub pito ka kilometro gikan sa bulkan sa idalum sini nga lebel.
Ginapaandaman ang publiko malapit sa Kanlaon batuk sa posible nga pamahog sang hinali nga paglupok sini, pagbuga sang lava kag abo, pagtupa sang bato kag lahar.
