ROXAS CITY – Ginpasidunggan ang Cuartero National HighSchool bilang 2019 National Winner sang Ten Accomplished Youth Organization (TAYO) sa Pilipinas sa idalum sang Culture, Arts and Heritage category sang TAYO Awards Foundation Inc.
Sa exclusive interview sang Bombo Radyo Roxas kay Ramie Capuyan, founder/adviser sang Cuartero National Highschool Taliamba Ensemble, ginpahayag sini nga nagbinuligay ang mga estudyante sa proyekto nga gintawag Enhanced Lowa Documentation Initiative (ELOWDI) nga naga-dokumento sa tanan ng lowa, isa ka folk poetry nga may nagkalain lain nga topiko nga ginatalakay kasubong sang paghigugma kag kultura sang isa ka lugar.
Tinutuyo sang ensemble nga magperform sang lowa nga natun-an sa mga tigulang para mapreserbar ang intangible cultural heritage sang nasambit nga banwa.
Matapos natukiban ni Capuyan nga madamo sang mga intangible cultural heritage ang banwa sang Cuartero sa Capiz, gintipon nila ini kag gingamit sa proyekto sang mga estudyante
Aminado si Capuyan nga indi nangin madali ang ila pagpasakup diri apang sa ila nga pagbuligay, natigayon nila nga makuha ang nasambit nga award nga naghatag sang bugal sa ila nga banwa kag sa probinsiya sang Capiz.
