Ginpasalig sang Civil Aviation Authority of the Philippines (CAAP) nga may bastante nga fuel supply ang mga airports sa bug-os nga pungsod sa tion nga makaeksperyensya sang power interruption sa tunga sang nagapadayon nga oil crisis sa pungsod.
Suno kay CAAP Spokesperson Eric Apolonio, talagsa lang ginagamit ang reserba nga gatong sa mga airports kag ginapreparar lamang sa tion nga may power failure sa mga supplies nga ila mabaton halin sa guwa.
Una diri, pila ka mga airport ang nag-anunsyo sang pagnubo sang flights umpisa Abril tubtub Mayo bangud sa limitado nga ruta kag manubo nga numero sang pasahero bangud sa nagapadayon nga armed conflict sa Middle East.
Suno kay Apolonio, ginalauman ang ini nga sitwasyon ilabi na nga nagtaas na sa 100% ang fuel surcharge, kon sa diin ginhatagan niya ang importansya ang epekto sini sa kita sang mga airlines.
Samtang, sa halos 44 ka mga commercially operated airports sa bug-os nga pungsod sa idalum sang CAAP, ginpasalig sini nga lunsay ang may yara sang bastante nga fuel supply sa pihak sang krisis sa langis.
