ROXAS CITY – Nagbukas na sang lunes nga adlaw ang isa ka cacao chocolate factory sa probinsya sang Capiz.
Sa interview sang Bombo Radyo kay Dr. Rose Marie N. Conlu, Chairperson sang Cacao Council Region 6 and Capiz Cacao Industrial Association, masadya sini nga ginsiling nga malapit na nga magasugod ang pagproduce sang tsokolate sa bug-os nga probinsya.
Suno diri, madamo sang local nga mga mangunguma ang mahatagan sang trabaho kun full operation na ang ila factory bangud apisar may mga makinarya sila nga pagagamiton, may yara sang mga trabaho nga kinahanglan sang pangamot sang tawo kasubong sang fermentation, drying, kag sorting sang cacao beans.
Makabulig man suno diri ang pagtanom sang puno sang cacao bilang alternative crop,baylo sa maisan ukon tubohan kag makabulig ini sang dako sa palibot, sa tion sang kalamidad ukon pagbaha.
Pahayag sini, mahimo magtanom sang cacao sa mataas nga bahin nga lugar ukon bukid bangud indi lang tsokolate ang makuha sa cacao apang madamo pa sang benepisyo nga makuha diri pareho sang wine, langgaw, cacao juice kag uling.
Dugang pa ni Dr. Conlu, nakanugunan ini bangud madamo na sa mga mangunguma ang ginpangtapas ang ila mga puno sang cacao sa rason nga wala masyado nagabakal diri sa probinsya kag kinahanglan pa magpadulong sa IloIlo agud mabaligya ang mga bunga ukon liso sini.
Gani, palig-on sang doktora sa mga mangunguma nga magtanom sang madamo nga puno sang cacao bangud handa sila nga magbakal, kag mahimo man nga magpasakop ang iban pa nga grupo kag mga mangunguma sa ila asosasyon.
Sa karon, ginahulat pa sang nila ang tion sang pagbulunga sang cacao kun sa diin ang season sini ang yara sa Septemeber tubtob January antes magasugod ang ila pagmanufacture amu man ang pagpahamtang sang Capelco sang ila kaugalingon nga transformer nga magahatag sang insakto nga boltahe para sa ila makinarya.
