Ginpatpat sang Capiz Electric Cooperative (CAPELCO) ang duha ka klase sang system loss sa kuryente.
Sa interview sang Bombo Radyo kay Engr. Edgar Diaz, General Manager sang CAPELCO, iya ginpahayag nga ang system loss amo ang diperensya sa kuryente nga ginabakal halin sa power supplier kag sa aktuwal nga nagamit sang mga konsumidor.
Suno kay Diaz, ang una amo ang technical loss ukon normal nga pagkadula sang kuryente tuga sang mainit nga panahon kag iban pa nga mga technical issues.
Ang ikaduha naman nga rason amo ang non-technical loss, nga possible halin sa mga iligal nga koneksyon, pagpangawat sang kuryente kag iban pa.
Ginpahayag man sini nga pagpatuman sang Systems Loss Charge sa Pilipinas ang ginapagdumalahan sang Energy Regulatory Commission.
Nahibuluan nga gin-anunsyo ni Presidente Ferdinand “Bongbong” Marcos Jr. sa iya ikalima nga State of the Nation Address (SONA) nga kuhaon sang gobyerno ang ginatawag nga system loss charge sa mga balayran sang kuryente.
