ROXAS CITY -Nagpanindugan ang pamunuan sang Capiz Electric Cooperative ukon CAPELCO nga liwat sila nga magapang-utod sang kuryente kag magapanukot sang penalidad sa mga kunsomidor nga wala makabayad sang ila electric bill bangud sang ginapangatubang sa karon nga pandemic.
Ini ang ginpahayag ni CAPELCO General Manager Edgar Diaz sang mainterview sang Bombo Radyo.
Ginpahayag ni Diaz nga nagdako ang bulanan nga balayran sang CAPELCO sa supplier sang power sang tion nga wala ginpuwersa sang sukot ang mga kunsumidor sang tinalikdan nga mga binulan bangud sang krisis.
Suno kay Diaz nga naglab-ut sa kapin P84 milyones ang balayran sang talatapan sa ila mga suppliers nga mas dako kun ikumparar sa ila nga ginabayaran sang tinalikdan nga mga binulan.
Bangud diri, ginpanindugan ni Diaz nga epektibo Hulyo 1, 2020, liwat sila nga mang-utod sang kuryente sa mga napaslawan nga makabayad kag magapanukot sang penalidad sa mga kunsumidor.
Samtang ginpasalig ni Diaz nga indi man sila basta-basta na lamang mang-utod sang kuryente sa mga kunsumidor nga wala makabayad sang ila nga bill.
Gin-athag sini nga pagahatagan sang 48 oras nga plaso ang kunsumidor nga makabayad sang ila nga electric bill.
