Ginaduso ni Capiz 1st District Board Member Dr. Cesar S. Yap Jr., ang ordinansa nga nagatukod sang Battle Against Dengue Program agud mapalig-on pa ang kampanya kontra dengue sa probinsya sang Capiz.
Sa regular session sang Sangguniang Panlalawigan, ginpahayag ni Yap nga paagi sa amo nga ordinansa, mapabakod ang responsibilidad sang tagsa ka pumuluyo kag komunidad sa pagpaninlo sang mga lugar nga mahimo estaran sang mga lamok.
Kabahin man sa programa ang mas hugot nga pagmonitor sang mga kaso sang dengue sa tagsa ka banwa kag madasig nga pagresponde kon may pagdamo sang kaso sa isa ka lugar.
Ginapanawagan man sini ang publiko nga magbinuligay sa pagtinlo sang palibot kag pagkuha sang mga nagatipon nga tubig nga mahimo pamugaran sang mga lamok agud malikawan ang paglapta sang dengue.
Nahibaluan nga naglab-ot na sa 1,544 ang kaso sang dengue sa probinsya sang Capiz.











