Ginsiguro sang Capiz Electric Cooperative nga wala sang mangin tuman nga epekto ang padayon nga pagsaka sang presyo sang gatong sa pagserbisyo sa mga konsumidor.
Sa interview sang Bombo Radyo kay Engr. Edgar Diaz, General Manager sang Capiz Electric Cooperative, iya ginpahayag nga indi pa direkta nga makaapekto ang pagtaas sang presyo sang gatong sa bill sang kuryente subong ngaa bulan sang Marso apang lauman ang amat-amat nga paghulag sang bayaran sa kuryente sa Abril bangud nagapadulong na sa summer season ang pungsod.
Suno kay Diaz, ang pagdungan sang pagtaas sang cost of power per kilowatt hour kag demand sang kuryente sa bulan sang Abril ang posible nga magresulta sa mas mataas nga bill sang kuryente.
Pahayag pa niya, magapadala sila sang sulat sa mga establisyemento nga may mataas nga load kag hingyuon nga likawan ang paggamit sang daku nga supply sang kuryente humalin las 5 sang hapon tubtob las 10 sang gab-i bangud sa sina nga oras mataas ang cost of generation.
Nagapanawagan man ang natungdan sa publiko nga magkooperar sa pagkinot sang kuryente agud makabulig sa apiyan-piyan sang gastos sa pan-adlaw-adlaw ilabi na sa krisis nga ginapangatubang sang pungsod sa padayon nga pagtaas sang presyo sang gatong bangud sa kinagamo sa Middle East.
