ROXAS CITY – Ginpaathag ni Governor Esteban ‘Evan’ Nonoy Contreras ang ginapatuman sa karon nga border restrictions sa mga tawo nga gikan sa Iloilo kag magasulod sa siyudad sang Roxas kag probinsiya sang Capiz.
Sa exclusive interview sang Bombo Radyo sa gobernador, ginpahayag sini nga makabig na nga Locally Stranded Individuals ukon LSI’s kag ipaidalom sa 14 day facility-quarantine ang mga indibidwal nga magahalin sa siyudad sang Iloilo kag magapadulong sa probinsya sang Capiz.
ANO BALA ANG MGA REQUIREMENTS?
Mahibaluan nga kalakip sa mga rekisitos nga kinahanglanon amo ang Valid ID, Thermal Scanning ukon pag-tsekyar sang temperatura pinaagi sa thermal scanner, Medical Clearance/Certificate para sa mga Authorized Personnel Outside Residence kag indibidwal nga (Valid for 72 hours); Letter of Acceptance (LOA) para sa mga LSI’s kag Travel Authority naman para sa mga Authorized Persons Outside Residence (APOR).
PAANO ANG MGA MAGAHALIN SA CAPIZ KAG MAGAPADULONG SA ILOILO?
Ginklaro sang gobernador nga para sa mga magahalin sa Capiz kag magapadulong sa Iloilo, kun balikan lamang sila, kinahanglan lamang nila mag-presentar sang medical certificate sa ila pagpauli sa Capiz.
Apang kun mahimo suno sa gobernador, indi na lang anay magpadulong sa Iloilo kun indi man sang importante ang transaksiyon.
PAANO ANG MGA RESIDENTE SANG CAPIZ NGA NAGA-TRABAHO SA ILOILO?
Para naman sa mga residente sang Capiz nga naga-trabaho sa Iloilo, nagpanugyan ang gobernador nga kun mahimo, indi na lang anay sila magpauli sa probinsiya bangud kabigon gid sila nga LSI.
Ginklaro man sang gobernador nga 15 diyas lamang magalawig ang amo nga pagsulundan nga magatakop man sa katapusan sang bulan sang Agosto.
Ang ini nga lihok suno sa gobernador ang kasunod sang padayon nga pagtimbuok sang kaso sang coronavirus disease (COVID-19) sa Iloilo bangud sang local transmission.
Mahibaluan nga ang Iloilo ang nagapabilin sa karon sa idalom sang General Community Quarantine (GCQ).
