ROXAS CITY – Ginkompirmar ni Capiz Governor Esteban Evan ‘Nonoy’ Contreras nga nabaton na sini ang sabat ni Roxas City Mayor Ronnie Dadivas sa iya ginpapanaog nga show cause order natuhoy sa pagpamalabag sang alkalde sa kapin 53 ka mga Locally Stranded Individuals ukon LSI’s nga magapauli kuntani sa probinsya gikan sa Batangas Port.
Suno sa gobernador nga pagatun-an kag lantawon sang legal department ang sabat sang alkalde sa nasambit nga show cause order.
Naghatag man sang sabat ang gobernador natuhoy sa pahayag sang kampo ni Dadivas nga wala siya sang poder nga magpapanaog sang show cause order sa local chief executive sang isa ka component city.
Ginpahayag ni Contreras nga may yara siya sang ‘supervisory capacity’ bilang isa ka gobernador.
May yara suno diri sang nangin basehan ang iya pagpapanaog sang show cause order batuk sa alkalde.
Ini ang nasaad suno kay Contreras sa pila ka probisyon sa Local Government Code of the Philippines.
Matandaan nga ginsabat ni Dadivas ang show cause order ni Contreras kun sa diin gintumod man sini nga sandig sa Local Government Code of the Philippines ang presidente gid lamang pinaagi sa Department of the Interior and Local Government ang may yara sang poder nga magpapanaog sang show cause order sang mga local officials sa pungsod.
