ROXAS CITY – Nagapati si Capiz governor Esteban Evan ‘Nonoy’ Contreras nga mas maayo kun indi pagtaguon sang isa ka coronavirus disease (COVID-19) patient ang pag-positibo sini sa amo nga sakit.
Ini agud mas mapahapos ang ginahimo nga contact-tracing sang mga otoridad kag makapanginlaman man ang mga nakasalamuha sini.
Matandaan nga nagpositibo sa amo nga sakit ang gobernador matapos nga ini ang nagpaidalom sa real-time polymerase chain reaction (RT-PCR) test.
Suno sa gobernador nga dako ang papel sang contact-tracing efforts agud matapna ang paglapta sang nasambit nga sakit.
Malipayon naman nga ginpahayag sang gobernador nga sa gihapon nagapabilin ini nga ‘asymptomatic’ ukon wala sang nabatyagan nga anuman nga sintomas.
Apang wala ini nagapakampante kag sa gihapon ginapabakod ang iya ikaayong-lawas pinaagi sa pagkaon sang masustansiya nga mga pagkaon kag pag-ehersisyo.
Nagapadayon man suno diri ang iya trabaho kun sa diin ginadul-ong lamang sa iya ang mga papeles kag dokumento nga kinahanglan sini pirmahan.
Gina-obserbar man sini ang mga health protocols kapareho sang pagsuksok sang face shield, mask kag gloves sa pagpamirma kag gina-disinfect man ang mga papeles antes ipaguwa.
Gin-ako man sang gobernador nga antes siya nag-positibo sa nasambit nga sakit, nakapadulong pa ini sa isa ka selebrasyon sang kaadlawan sang isa niya ka staff sa Barangay Casanayan, Pilar.
Apang sadto nga tion suno sa iya, wala pa ini makapaidalom sa test kag wala paman sadto nagguwa ang resulta sang swab test sang empleyado.
Nagalaom man ang gobernador nga wala ini sang may nalatnan sa iya mga close-contacts bangud ang iya kaupod sa halos adlaw-adlaw nga si Provincial Administrator Edwin Chinel Monares ang nag-negatibo na sa RT-PCR test.
Mahibaluan nga ginkompirmar ni Mr. Joefry Espiritu, ang Development Management Office IV sang Department of Health (DOH) Capiz nga kapin 170 na ka mga indibidwal ang ila natumod nga naka-close contact sa gobernador.
Ginmanduan na ang mga ini sa pagpaidalom sa strict-home quarantine kag isolation samtang nagapadayon ang testing.
Ginpahayag pa ni Espiritu nga posible pa nga madungan sang nasambit nga numero samtang nagapadayon ang ila nga contact-tracing efforts.
