ROXAS CITY – Ginkasubo ni Capiz Governor Esteban Evan “Nonoy” Contreras ang desisyon sang tatlo ka mga alkalde sa probinsya sang Capiz matapos ang ginhinyo nga “Time-Out” sa pagpapuli sa mga Locally Stranded Individual (LSI’s) sa ila mga banwa.
Ini ang ginpahayag ni Contreras sang mainterview sang Bombo Radyo.
Suno kay Contreras nga ginarespeto man sini ang desisyon sang mga alkalde sang banwa sang Dumalag, Jamindan kag Panitan sa indi anay pagbaton sang mga LSI’s.
Apang, nabalaka lamang ang gobernado bangud tion man kuntani sang mga ini nga makapauli kag makaupod ang ila mga pamilya subong nga paskwa sa pihak sang ginapangatubang sang pungsod nga pandemya.
Wala man sang problema si Contreras natuhoy diri bangud aprubado man ini sang Regional Inter-Agency Task Force ukon RIATF ang ginhinyo sang amo nga mga alkalde.
Samtang, pag-abot naman sa ginahinyo nga dugang nga mga flights sang eroplano kag biyahe sang mga sakayan pandagat sa probinsya nagpahayag naman si Contreras nga pagadugangan nila ini.
Ginpahayag sang gobernador nga naintiendihan man sini ang panawagan sang mga airline company kag ferry bangud naapektuhan naman ang local economy sa probinsya.
