ROXAS CITY – Natalana nga magsumiter si Capiz Governor Antonio del Rosario sang counter affidavit sa ginpasaka nga reklamo batuk sa iya ni Mr. Essex Quintia, ang provincial chairman sang PDP-Laban.
Sa interview sang Bombo Radyo Roxas kay Del Rosario, ginpahayag sini nga ang pagsumiter sang iya nga counter-affidavit ang isa ka pamaagi agud iya nga madepensahan ang iya kaugalingon sa mga alegasyon nga ginapatuto sa iya nga suno sa iya lunsay mga kabutigan lamang.
Apang kinahanglan man suno sa iya nga imbestigahan ang kredibilidad ni Quintia sa pagpasaka sang reklamo.
Nag-ugat ang reklamo ni Quintia batuk kay Governor del Rosario bangud sa paglapas sini sa Memorandum Circular No. 6 series of 2016 nga nagadumili sa mga opisyal sang gobyerno nga magsulod kag magsugal sa mga casino.
Base sa ebidensiya nga ginauyatan ni Quintia, may nakuha nga laragway sang opisyal nga nagpadulong sa URL World Pitmasters Cup 2017 sa Resorts World Hotel and Casino sa Pasay City.
Gindugang pa sang gobernador nga isa man siya ka ‘cockfighting aficionado’ apang iya man nga kwarta ang iya nga ginagamit kag indi sang kwarta sang gobyerno.
