CAPIZ- Nagapadayon ang obserbasyon kag pagbantay sang mga healthcare personnel sa probinsya sang Capiz may kaangtanan sa suspected cases sang balatian nga Monkeypox sa probinsya.
Sa interview sang Bombo Radyo kay Ms. Charmaine Quimpo, Registered Nurse, Nurse V sang Provincial Health Office, ginpahayag sini nga may pito ka “suspected cases” nga gina-usisa pa sa subong ang ila sini nga grupo.
Dugang pa sini, ang ini nga mga indibidwal ang nagapakita sang mga sintomas nga nagasapaw sa bulutong-tubig (chickenpox) kung sa diin naga palareho sa mga sintomas man sang Mpox.
Nahibaluan nga ang Mpox, una anay nagapakita bilang rashes, kag naga amat amat nga mangin lesion nga daw kaangay sang bulutong-tubig kun maglupok. Nagalapta ang amo nga balatian pamaagi sa paghalok, paghakos kag closed contact ukon pag gamit sang mga kagamitan nga iya sang may Monkeypox.
Samtang, yari ang mga ginabantayan nga mga kabanwahan nga may suspected cases sang amo nga balatian; Dumalag may duha, Jamindan-isa, Pilar-isa, Pontevedra-isa, Sapian-isa, kag syudad sang Roxas nga may isa man.
Nagpanawagan naman si Quimpo sa publiko nga kun may nakita ukon nabatyagan nga kaangay sintomas sang Monkeypox, gilayon nga magpadulong sa ospital agud matatap kag mahatagan sang nagakaigo nga pagbulong kag malikawan nga makatapon pa sa iban.
With a report from Bombo Francis Biñas
