ROXAS CITY – Gin-athag ni Provincial Health Officer I Dr. Leah del Rosario sang Provincial Health Office (PHO) Capiz nga nagapabilin nga 2019 Novel Coronavirus (NcoV) free ang probinsya sang Capiz.
Ini ang ginkumpirmar ni del Rosario sang ma-interview sang Bombo Radyo.
Suno kay del Rosario nga wala pa sang suspected case sang nCoV sa probinsiya.
Bangud diri nagaapelar ini sa publiko nga untaton na ang pagpinalapta sang mga fake news bangud nagahatag ini sang panic.
Samtang ginpatpat ni del Rosario nga madamo sang klase ang coronavirus kapareho na gid lamang sang SARS kag iban pa.
Ini nga virus ang ginatunaan sang influenza-like-illness kag nagaresulta sang balatian nga pneumonia.
Ginklaro ni del Rosario nga madamo man sang nagaayo sa nasambit nga balatian.
Ang nasambit nga virus ang mahimu nga makuha sa naga-ubo, nagapangatsi bangud makabig ini nga airborne disease.
Nagpanugyan si del Rosario sa publiko nga indi pagkalipatan ang pagpanghugas sang kamot sa tanan nga oras ilabi na sa tion sang pagkaon, pagguwa sa comfort rooms, paguyat sa mga doorknobs kag iban pa.
Sa tion nga mag-ubo kag magpangatsi, maggamit sang tissue para itabon kag gilayon ini nga i-dispose.
Agud malikawan ang NcoV indi pagkalimtan ang abbreviation sang WUHAN, nga amo ang W-Wash hands, U-Use masks, H-Have your temperature check daily, A-Avoid crowded places kag N-Never touch your face with your unclean hands.
