ROXAS CITY – Nangin malinong kag matawhay ang bilog nga probinsiya sang Capiz kadungan sang ika-lima nga State of the Nation Address (SONA) ni Presidente Rodrigo Duterte.
Ini ang ginpahayag ni Capiz Police Provincial Officen Director P/Col. Julio Gustilo Jr. sang mainterview sang Bombo Radyo.
Suno diri nga ginmanduan ang magkatuhay nga mga municipal police stations nga magpabilin nga nakaalerto.
Ginpasangkad man ang information-dissemination campaign sang mga kapulisan kag pagpatigayon sang checkpoint sa mga kabanwahanan.
Hugot man nga gindumilian ang mga progresibo nga grupo sa pagpatigayon sang mga hublag-protesta kadungan sang amo nga kahiwatan apang nagpatigayon sa gihapon sang mobile caravan rally protest ang mga ini.
Wala suno diri sang napagkit nga dalagkuan nga insidente nga nagluntad kadungan sang amo nga kahiwatan.
Dako man ang pagpasalamat ni Gustilo sa publiko bangud sa padayon nga pagsuporta kag kooperasyon sa hanay sang pulisya.
