ROXAS CITY – Kadungan sa pagselebrar sang Safe Motherhood Week, may panugyan ang Capiz Provincial Health Office sa tanan nga mga iloy.
Sa interview sang Bombo Radyo kanday Ma. Theresa Asis, Manager sang National Safe Motherhood kag Mr. Ayr Altavas Provincial Information Officer sang Capiz PHO, gin-isa-isa sang mga ini kung anu ang dapat kag indi dapat himuon sang isa ka iloy kung ini ang nagabusong, antes magbata kag pagkatapos magbata.
Suno kanday Asis kag Altavas, importante nga mahibaluan sang tagsa ka mga iloy kung paano mapabilin nga mapagros, mabakod, kag malayo sa sakit ang lapsag subong man kung paano atipanon ang kaugalingon matapos magbun-ag sang bata.
Mahibaluan nga kada ika-duha nga semana sang Mayo, ginaselebrar sa Pilipinas ang National Safe Motherhood Week kung sa diin ang nasambit nga selebrasyon nagaduso sa ikaayong lawas kag nutrisyon sang kada iloy.
Ginatutukan sini agud masiguro nga ang mga iloy kag lapsag may yara sang instakto nga pag-atipan antes, samtang, kag pagkatapos magbata.
Magluwas sa safe motherhood week, ginaduso man ang National Safe Motherhood Program, kung sa diin nagapanguna nga tinutuyo sini agud siguruhon nga may yara sang access sa mga kalidad nga serbisyo sa pag-atipan sa ikaayong lawas sang iloy.
Ini dako nga butang agud may yara sila sang luwas nga pagbusong kag pagbata.
Ginpahayag man nanday Asis kag Altavas nga kinahanglan kumpletuhon sang iloy ang ginatawag nga prenatal check-up agud mahibaluan ang sitwasyon sang bata sa iya tagu-angkan subong man ang immunization para sa mga lapsag agud malikawan ang posible nga mga sakit nga mahimo makalaton sa ila.
Importante man nga yara ang bilog nga suporta nagikan sa asawa, pamilya kag himata sa tion sang pagbusong kag pagbata bangud dako ini nga bulig agud madasig ang pagrecover sang isa ka iloy.
