Nagpahanumdom ang Capiz Provincial Health Office (PHO) sa publiko sang importansya sa balanse nga pagkaon agud malikawan ang malnutrition, ilabi na sa mga kabataan.
Sa interview sang Bombo Radyo kay Josephine Moises, Nutrition Officer III sang Capiz PHO, iya ginpahayag nga indi kinahanglan nga mahal mga pagkaon agud kabigon nga masustansya.
Suno kay Moises, bugana ang probinsya sang Capiz sa mga lokal nga produkto, ilabi na ang seafood, bangud ginkilala ang probinsya bilang Seafood Capital of the Philippines.
Nahibaluan nga ang pagkaon sang seafood nagahatag sang madamo nga sustansya kaangay sang protina, omega-3 fatty acids, kag iban pa nga mga bitamina nga mahatag sa ikaayong lawas.
Dugang pa ni Moises, magluwas sa seafood, may yara man sang madamo nga lokal kag barato nga pagkaon nga mahimo ipreparar para sa pamilya agud masiguro nga mabaton sang tagsa ka miyembro sang pamilya ang nagakaigo nga nutrisyon.
base sa pinakabag-o nga datos sang Capiz PHO, may 153 ka kabataan nga nagaedad 0 tubtob 59 ka months ang nalista nga severely wasted, base sa ila weight-for-length kag height indicator.
Nagpanawagan man ini sa mga ginikanan nga hatagan sang nagakaigo nga pagkaon kag nutrisyon ang ila mga kabataan agud malikawan ang malnutrition kag mapadayon ang ikaayong lawas.
