ROXAS CITY – Padayon ang pagpatigayon sang imbestigasyon sang Capiz Provincial Health Office (PHO), may kaangtanan sa ginapahayag nga mga estudyante nga na food poison sa isa ka resort sa syudad sang Roxas.
Sa interview sang Bombo Radyo kay Mr. Joeffrey Espiritu, Public Information Officer sang Capiz PHO, ginsiling sini nga indi pa sa karun nila mapat-od kung ang mga biktima matuod nga nakakaon ukon nakainum sang kontaminado sa nasambit nga resort kabangdanan sang ila pagpa-ospital kag wala sila nakakuha sang specimen kung sa diin dako kun tani nga basehan kung ini ang mapatest.
Suno kay Espiritu, padayon ang ila pagpakig-angut sa iban pa nga mga kaupdanan sang mga na-ospital agud hibaluon kung sila naka-eksperyensya man sang kaangay nga mga sintomas.
Mahibaluan nga ang mga sintomas nga na-eksperyensyahan sang mga ini ang makabig nga sulod sa food poison apang maid-id pa nila nga gina-imbestigahan ang nasambit nga insidente.
Matandaan nga ginpadangat sa Roxas Memorial Provincial Hospital ang pulo (10) ka mga estudyante kaupod ang isa ka guest speaker matapos ginapahayag nga maka-ekperyensya sang pagpalanakit sang tiyan, pagpalanuka kag paglingin sang ulo matapos makakaon sang gin-serbe nga creamy beef sa nasambit nga resort.
