Hugot nga ginabantayan sang mga katapo sang kapulisan ang sitwasyon kadungan sa pagselebrar sang Undas 2024.
Sa interview sang Bombo Radyo kay PCOL. Jerome Afuyog Jr., Head sang red teaming, Regional Investigation Detection and Management Division, ginpahayag sini nga ginabantayan sang mga ini kun intsakto man ang ila sini nga ginpreparar nga set-up sa tagsa ka mga pwesto sang mga kapulisan agud mapabilin ang kalinong kag katawhay sa tagsa ka mga sementeryo sa probinsya sang Capiz.
Dugang pa sini, pinaagi sa ila ginhimo nga set-up diri nila mahibaluan kun ano pa ang dapat nga i-improbar para sa mga masunod pa nga pagsaulog sang tig-kalalag.
May pila man suno diri sila nga nakita nga mga ginadumilian nga butang sa mga indibidwal nga nagapadulong sa sulod sang sementeryo. Wala nalang suno sang mga ini ginapasulod ang amo nga mga indibidwal kag nangin matawhay man ang relasyon sang kapulisan kag sang mga pumuluyo.
Ginapaandaman man suno ni Afuyog ang mga kapulisan nga maglibot sa sulod sang sementeryo para masigurado nga wala sang may mga residente nga nagabayular sa ginpatuman nga paandam.
Sa karon, padayon pa ang paglibot sini sa tagsa ka mga sementeryo agud ma-chekyar ang sitwasyon kag bilin sini sa mga residente, magdala kag mag-inom sang tubig kag i-secure ang dala nga mga pagkabutang.
