ROXAS CITY – Yara na sa full-alert status ang mga kapulisan sa probinsiya sang Capiz agud magpasiguro sang kalinong kag katawhay sang nagahilapit nga May 13 midterm elections.
Ini ang ginpahayag ni Capiz Police Provincial Office Provincial Director Police Colonel Canilo Fuentes kasunod sang ila ginpatigayon nga send-off ceremony sa Camp Teodorico C Apil sa Barangay Lanot, Roxas City.
Suno kay Fuentes nga hugot ang ila nga pagpahanumdom sa mga kapulisan nga sundon ang ila nga mandatu sa pagpatuman sang hugot nga seguridad sa nasambit nga piniliay.
Mahibaluan nga may gintukod suno sa iya nga Provincial Joint Security Control Center nga ginapangunahan sang Commission on Elections (Comelec).
Nakaalerto sa tanan nga oras ang mga kapulisan humalin pa sang nagpatigayon sang mga pre-election activities.
Masobra isa ka libo ka mga kapulisan ang ginpang-deploy agud magpasiguro sang seguridad para sa nasambit nga piniliay.
Magluwas sa mga kapulisan sa probinsiya sang Capiz, may augmentation forces man gikan sa Police Regional Office (PRO6) nga mangin katuwang sa pagpasiguro sang kalinong kag katawhay sa nasambit nga eleksiyon.
