ROXAS CITY – Ginapasiguro sang Capiz Police Provincial Office (CPPO) nga hugot nila nga ginapatuman ang suspensyon sang permit to carry firearms outside residence sa mga pumuluyo sa probinsya sang Capiz.
Sa interview sang Bombo Radyo kay PMaj. Ruby Magallanes, public information officer sang Capiz PPO, suno diri, nga apisar may pila ka mga exemption sa sini nga direktiba, kun sa diin ang sarang lamang nga makabitbit sang armas luthang amu ang mga miyembro sang PNP, AFP kag iban pa nga Law Enforcement Agencies nga nagapatuman sang ila official duty samtang naka-uniporme, wala sila sang pagapilion sa pagpatuman sini nga mandu nagikan kay PNP Chief General Guillermo Eleazar.
Nahibaluan nga nagpaguwa sang memorandum si Eleazar sa pagpatuman sang gun ban sadtong Oktubre 1 kag magadugay tubtob Oktubre 9, sini nga tuig.
Ini agud masiguro sang PNP ang matawhay kag hilway nga pagpatuman sang filing of certificate of candidacy (COC) para sa 2022 national kag local elections.
Ginsiling man ni Magallanes, nga diri sa probinsya sang Capiz, sa karon wala pa sang naglapas sa amu nga pagsulundan.
Ini bangud hugot nga ginapatuman sang mga kapulisan ang checkpoint, kag nagapati ini nga madamo sang mangin maayo nga epekto ang checkpoint, indi lamang sa pagdakup sa mga magalapas sa gun ban kundi pati man sa pagtapsa sang iban pa nga krimen sa probinsya.
