CAPIZ – Nagpakigbahin ang Capiz Police Provincial Office sang mga accomplishment sang ila talatapan sa tuig 2025.
Sa interview sang Bombo Radyo kay Police Captain Merry Chris Dela Cruz, Spokesperson sang Capiz Police Provincial Office, iya ginpahayag nga ang nasambit nga mga accomplishment sang 2025 ang gindihon humalin bulan sang Enero tubtob bulan sang Disyembre.
Suno kay Police Captain Dela Cruz, sa kampanya batuk sa iligal nga droga, sa 93 ka ginpatigayon nga operations, may yara sang 103 ka mga personalidad ang nagkaladakpan.
Sa kampanya batuk sa mga wanted persons, 73 ka mga most wanted persons ang nagkaladakpan kag 261 ka iban pa nga mga wanted persons.
Sa kampanya batuk sa illegal gambling, may yara sang 60 ka mga persona ang nadakpan samtang 305 naman ka mga armas luthang ang gin-surrender sa ila talatapan.
Sa kampanya naman batuk sa iligal nga pagpangisda, may yara sang 321 ka mga naaresto kag sa bahin naman sang ilillegal logging, may yara sang 23 ka mga persona.
Sa bahin sang kampanya sang ila talatapan batuk sa mga miyembro sang New Peoples Army, may yara sang 2 ka nadakpan, 6 naman ang nagsurrender kag 121 ang mga nagwithdraw sang suporta.
Pahayag pa niya,kadungan sang holiday, may yara man sila sang nakumpiska nga mga iligal nga palupok kun sa diin 103 diri ang trianggulo kag 39 ang improvised boga nga madasig man nga ginispose sang mga otortidad.
Nagpanawagan man ang natungdan sang dugang nga pag-intindi kag kooperasyon sa publiko agud nga mapabilin ang kalinong kag kawhay sang palibot.
