All set na ang Capiz Provincial Government para sa pagselebrar sang Capiztahan 2026 sa probinsya.
Sa interview sang Bombo Radyo kay Mr. Alphonsus Tesoro, Head sang Provincial Tourism and Cultural Affairs Office, iya ginpahayag nga sa pihak sang krisis nga ginapangatubang sang pungsod, gintinguhaan gid sang gobyerno probinsyal nga mahiwat ang amo nga aktibidad agud nga ma-enjoy indi lamang sang mga pumuluyo kundi subong man sang mga dumuluong.
Pila sa mga highlight amo ang Kapusod IMAW Cultural Exchange nga pasakupan sang probinsya sang Capiz, Aklan kag Romblon; Hangaway kag Lin-ay sang Capiz 2026, Surambaw Food Fest, Streat Party, Maragtas Cultural Parade and Performances, Street Dancing, mga dinapit nga bisita kasubong sang mga kilala nga artista kag iban pa.
Suno kay Tesoro, ang kabug-usan nga pondo para sa amo nga kahiwatan ang yara nalang sa P44 million matapos nga ginbuhinan bangud sa pila ka mga mandato sang national government agencies may kaangtanan sa krisis nga ginapangatubang. Una ini nga ginpondohan sang indi magnubo sa P55 million.
Pahayag niya, madamo sang mga balantayan sa amo nga aktibidad, bangud halos tanan nga nakalinyada nga mga kahiwatan, ginalantaw na niya nga pagadugukan kag ikasadya sang mga Capiznon.
Nagpahanumdom naman ang natungdan sa publiko nga mangin responsable sa tion sang paglibot kag pagselebrar sang amo nga kahiwatan agud malikawan ang kun ano nga sahi sang insidente ang posible nga magluntad.
