Naghatag sang pila ka tips ang Capiz Provincial Health Office agud nga mapabilin nga safe kag healthy ang pagsaulog sang bag-ong tuig.
Sa interview sang Bombo Radyo kay Mark Anthony Blanco, Nurse II sang Capiz Provincial Health Office, iya ginpahayag nga apisar madamu ang mga pagkaon sa pagsaulog sang Bag-ong tuig, importante nga balanse ini kag ginakalakipan sang Go, Grow kag Glow foods.
Suno kay Blanco, bangud sa asud-asud nga kinan-anay, importante man nga mag-ehersisyo kaangay sang pag-jogging, pagdalagan ukon paglakat agud nga maibanan ang fats nga natipon sa lawas bangud sang pagkaon.
Samtang, kinahanglan man sang paghalong sa pagbyahe sa subong nga tion, I-tsekyar ang mga salakyan antes nga magbyahe agud masiguro ang kaluwasan sa dalanon.
Pahayag pa niya, hugot man ang ila nga kampanya batuk sa pagdumili sang paggamit sang palupok bangud sa padayon nga nagasaka nga kaso sang mga nalukpan.
Nagpanawagan man ang natungdan sa publiko nga halungan kag mangin responsable sa ikaayong lawas agud nga mangin manami ang pagsaulog sang masunod nga tuig.
