Ginpakigbahin sang Capiz Provincial Tourism and Cultural Office ang mga accomplishment sang tuig 2025.
Sa interview sang Bombo Radyo kay Mr. Alphonsus Tesoro, head sang Capiz Provincial Tourism and Cultural Office iya ginpahayag nga ang nasambit nga mga accomplishment ang tungod sa pagbinuligay sang tanan nga mga katapo sang ila talatapan kaupod ang provincial government.
Suno kay Tesoro, mas naga-umwad ang turismo kag nagataas ang numero sang mga turista nga nagapadulong agud nga bisitahon ang probinsya sang Capiz.
Padayon man ang ila nga tourist site inspection agud nga mapabilin ang katahom sang mga tourist spot diri sa probinsya sang Capiz.
Subong man, nangin madinalag-on an ang Paskwa sang Maragtas nga ginpasakupan sang nagkalain-lain nga mga banwa sa probinsya sang Capiz nga nagpakita sang katahom kag istorya gamit ang mga maanyag nga dekorasyon.
Mas ginpasangkad man sang ila nga talatapan ang pagpromote sang probinsya gamit ang social media platform amo man ang paglunsyar sang mga local tourism products agud mas makilala pa ang mga produkto sang Capiznon.
Pahayag pa niya, ginahandaan man ang palaabuton nga Capiztahan nga ginalauman magaganyat pa sang mas madamu nga turista.
Ginpasiguro man sang natungdan nga magapadayon ang mga programa sang ila talatapan sa pagpasangkad kag pag promote sang turismo sang probinsya sang Capiz subong nga tuig 2026.
