ROXAS CITY – Wala pa sang nabalhag nga nagpositibo sa makalalaton nga balatian nga pertussis ukon whopping cough sa probinsya sang Capiz humalin sang 2009 tubtob subong nga 2024.
Ini ang ginkumpirmar ni Dr. Ramon Nolasco, Provincial Health Officer II sang Capiz Provincial Health Office sang mainterview sang Bombo Radyo.
Suno diri, may yara sang 4 ka suspected cases nagikan sa 2 ka kabanwahanan bangud sa ka-anggid nga sintomas sa nasambit nga balatian apang indi ini makabig nga pertussis bangud wala ini nasulod sa criteria.
Sa pihak sini, hugot nga ginapahanumduman ni Nolasco ang publiko nga indi magpakampate bangud ang pertussis ang isa ka makalalaton nga balatian dala sang bordetella pertussis sa diin posible ini magresulta sa kamatayon kun mapabay-an ilabi na naga-apekto ini sa baga kag alagyan sang pagginhawa.
Pahayag ni Nolasco, may yara sang 3 ka stages sa balatian nga pertussis, una amu ang early symptoms – naka-eksperensya ang pasyente sang sintomas kasubong sang sip-on, lagnat kag pag-askad sang tutunlan sa sulod sang 1-2 ka semana; later symptoms – wala untat ukon ginabarukoy sang ubo; kag recovery stage – amu ang amat-amat nga paghagan sang pag-ubo.
Dugang pa sini nga makabulig agud malikawan ang balatian kun nabakunahan sang 3 ka primary immunization doses sang DTaP (diphtheria, tetanus kag acellular pertussis vaccine) ang lapsag naga-edad 3 tubtob 6 ka semana.
Ang pertussis ang nagalaton pinaagi sa respiratory droplets halin sa pag-ubo ukon pagpangatsi sang infected nga tawo.
Panugyan ni Nolasco sa publiko, nga ugalion ang paghugas sang kamot, maggamit sang tisyu ukon panyo kun mag-ubo ukon magpangatsi agud indi maglapta ang kagaw kag mapalayo sa makalalaton nga balatian.
