ROXAS CITY — Emosyunal nga nagpadulong sa Bombo Radyo ang isa ka iloy para ipanawagan ang iya anak nga missing sa karun sa Atlanta, Georgia, USA.
Nagakabalaka si Mrs. Elsie Bustamante sang Barangay Intongcan, Pontevedra, Capiz matapos nga indi nila makontak si Cecilia Bustamante nga nagatrabaho sa isa ka restaurant sa nasambit nga lugar.
Katapusan nga na-istorya sang pamilya ang ila nga himata sang Oktubre 2016 kag sumugod sadto wala na sila sang balita diri.
Base sa impormasyon nga nakalab-ot sa pamilya sang Capizeña, katapusan ini nga nakita sang kaupdanan sa restaurant sang Oktubre, apang madasig ini nga nagbiya sa restaurant kag sumugod sadto wala na nagareport sa iya nga trabaho.
Nahibaluan nga may pito ka tuig nga anak si Cecilia sa Filipino-American partner sini nga si Carlo Johnson.
Suno kay Gng. Bustamante tuig 2008 sang katapusan nga nakapauli sa Pilipinas ang iya anak kag sumugod sadto sa cellphone na lamang kag social media ang ila nga komunikasyon.
