Capizeño gold medalist sa Sea Games, nakabaton sang hero’s welcome sa airport
ROXAS CITY – Mainit nga ginsug-alaw sa syudad sang Roxas kag probinsiya sang Capiz ang Capizeño na pencak silat gold medalist nga si Denis Dumaan.
Sa interview sang Bombo Radyo Roxas kay Denis Dumaan sang Barangay Timpas, Panit-an, Capiz, ginpahayag sini nga wala niya ginalauman nga sug-alawon ini sang madamo nga mga Capizeño sa airport kag madamo pa ang nagpakuha sang litrato.
Aminado si Dumaan nga excited ini nga makaabot na sa ila balay para personal nga mahakus ang mga ginikanan nga nagserbe sini nga inspirasyon kag motibasyon para makuha ang bulawan nga medalya sa pencak silat sa Sea Games sa Kuala Lumpur, Malaysia.
Nahibaluan nga indi man magdugay ang gold medalist sa Capiz, bangud magabalik man ini sa Metro Manila sa ila nga training para sa natalana nga sambuwa sa South Korea sa Septiembre 21, 2017.
Samtang, ginkalipay ni Dumaan sang makalab-ot sa iya ang balita nga may mabaton nga cash incentives nga P300,000 ang mga gold medalist sa Sea Games, sa diin ginpahayag sini nga daku nga bulig ang nasambit nga kantidad agud mabuligan sini ang pamilya, mapa-eskwela ang mga utod kag mapakaayo ang ila balay.
