ROXAS CITY – Nakakuha sang duha ka medalya, isa ka silver kag bronze medal ang isa ka proud Capizeño nga si Gino Paulo Aguro Buizon sa 23rd World Championship of Performing Arts (WCOPA) sa Long Beach, California.
Si Buizon nga taga Dao, Capiz, isa ka nurse ang nagrepresenta sa Pilipinas sa prestiyoso nga kumpetisyon.
Kalakip sa mga nakuha nga medalya ni Buizon ang silver medal sa vocal solo rap category kag bronze medal sa vocal world music category, sa diin tagalog song ang iya nga master piece.
Suno kay Buizon nga tuman ang iya kalipay nga nabatyagan matapos nakakuha sang duha ka medalya, bangud pamatood lamang ini nga nagbunga na ang iya sakripisyo .
Aminado ini nga bangud first time sini nga makapasakup sa international competition, may kulba ini nga nabatyagan, apang sang yara na ini sa stage para magkanta,ginhatag na sini ang iya best performance bangud luyag sini mahatagan sang kadungganan ang iya nga hometown, home province kag ang Pilipinas.
Samtang nagapati si Buizon nga may medalya ukon wala daku na nga kadungganan sa ila bangud ang malakip pa lamang sa nasambit nga kumpetisyon, daku na nga bagay para sa isa ka artist kasubong niya.
