ROXAS CITY – Ginakabig ngacharge to experience na lamang sang negosyante nga Capizeño ang pagdonate sang P5,000 sa kontrobersiyal nga KAPA Community Ministry International Inc. ukon Kabus Padatoon.
Sa interview sang Bombo Radyo Roxas kay Mr. Mario Ramos, wala na ini sang plano nga lagson ukon i-reklamo pa ang pamunuan sang nasambit nga investment scheme, bangud nabatian niya mismo sa Bombo Radyo Roxas ang gindalahigan nga kontrobersiya sang KAPA Community Ministry International Inc.
Ini man ang rason suno kay Ramos nga naglab-ot lamang sa P5,000 ang iya nga gindonar sa KAPA Iloilo-Pavia Branch sa pagpamuno sang officer in-charge nga si Mr. Isagani Capitle, bangud madamo na ini sang negative feedback nga nabatian batuk sa nasambit nga nasambit nga investment scheme.
Nagpanindugan man ang negosyante nga desisyon sini ang paghatag sang donasyon sa nasambit nga grupo bangud gusto sini mapamatud-an kun matood may 30 porsyento nga nabataon nga love gift ang mga nagapasakup diri.
Nahibaluan nga sa karon wala na ini sang komunikasyon kay Capitle matapos naglapta ang balita nga nakalab-ot na sa Capiz ang kontrobersiyal nga KAPA Community Ministry International Inc. ukon Kabus Padatoon.
