Dako nga bugal sang Capiz, ang napagkit sang isa ka Capiznon, bilang isa sa Top 10 Awardee of Outstanding Student Leader of the Philippines.
Sa interview sang Bombo Radyo kay Jude Patrick Ruiz Delfin , 4th Year agriculture and biosystem engineering student sang Capiz State University-Pontevedra Campus kag tumandok sang Daga, Panay, Capiz, iya ginpahayag nga indi nangin madali ang iya mga naagyan antes makuha ang nasambit nga pasidungog.
Suno kay Delfin, ang mga mangunguma nga nagapananum sang kalabasa ang nangin inspirasyon niya agud umpisahan ang advocacy nga ginhingadlan “Judelights”, kun sa diin ginahimo niya sang mga nagkalain-lain nga delicacies ang kalabasa agud mapuslan pa kag mabaligya sa publiko sa bag-o nga dagway.
Pahayag pa niya, sa nasambit nga programa, mahaba ang proseso sang pagpili, maghalin sa masobra 200 ka nominees, nangin top 20 tubtob sa nalab-ot ang top 10 awardees.
Ang mga ginbasehan sang pagpili amo ang closed door interviews, formation camp kag labaw sa tanan, ang advocacy nga ginpakilala kag kun paano ini nakabulig sa iban nga tawo.
Nahibaluan nga tatlo na ka tuig ang nagligad sang mapaslawan si Delfin nga makuha ang nasambit nga award apang sa iya nga determinasyon kag sa bulig sang mga tawo nga nagapati sa iya, subong nga tuig natigayon na siya nga malakip sa mga awardee
Nagapati siya nga bisan ano kabudlay kag kun ginahatag sang Makaako, sigurado nga kayanon gid.
Dugang pa sang natungdan, sa tanan nga mga estudyante nga kaangay niya, indi gid magdula sang paglaum, magpadayon lang kag mangin maayo nga ehemplo para sa iban pa nga mga kabataan.
