Roxas City – Magpili sang oras nga productive ang imu kaugalingon sa tion nga magtuon.
Ini ang ginpahayag ni Nikko Martirizar Top 4 Mechanical Engineer Exam, sang ma-interview sang Bombo Radyo.
Suno kay Martirizar, daw indi siya makapati nga isa siya sa mga nakapasar kag nakasulod sa Top 10 bangud nakahibalo ini kun anu kabudlay ang mga exam nga ila ginsabtan.
Mahibaluan si Martirizar ang nakakuha sang average rating nga 93.50% sa ginpatigayon nga exam sadtong Pebrero 26 kag 27 sang ISAT-U isa ka top-performing nga buluthuan nga may passing percentage nga 97%.
Makabig man ini nga bugal sang Capiz, bangud Tumandok ini sang Barangay Daga banwa sang Panay.
Dako man ang iya pagpasalamat sa iya pamilya nga wala naga-untat sa paghatag sang suporta kag nagapahanumdum nga indi pag-i-pressure ang kaugalingon sang tion nga naga-review ini.
Ginpakigbahin man sini ang pila niya ka mga technique sa pagtuon sa diin indi kinahanglan nga piliton ang kaugalingon nga magtuon adlaw-adlaw, maghatag sang tion agud maka-relax ang pinsar kag magpamati sa manunudlo sa tion sang klase.
Naglawig sang lima ka bulan ang pag-review ni Martirizar sa Cebu City kaupod ang mga classmates sini.
Mensahe sini sa mga kabataan nga kinahanglan may yara sang disiplina sa kaugalingon kag hatagan sang importansya kag tion ang pagtuon.
