ROXAS CITY – Nangin madinalag-on sa kabug-usan ang selebrasyon sang charter anniversary sang probinsiya sang Capiz nga Capiztahan humalin Abril 12 tubtob 15, sini nga tuig.
Ini ang ginpahayag ni Provincial Tourism and Cultural Affairs Office Head kag National Commission for Culture and the Arts (NCCA) Commissioner Alphonsus Tesoro sang mainterview sang Bombo Radyo.
Suno kay Tesoro, madamo sang positibo nga mga feedbacks ang ila nabaton gikan sa mga bisita pinaagi sa ila ginpanagtag nga mga evaluation forms kag sa social media.
Ginpahayag pa sini nga bukas man ang gobyerno-probinsiyal sang Capiz para sa mga ‘areas of improvement’ agud ilabi pa nga mapaayo ang nasambit nga selebrasyon.
Malipayon si Tesoro bangud madinalag-on ang mga inobasyon nga gintinguhaan sang gobyerno-probinsiyal pinaagi sa Provincial Tourism and Cultural Affairs Office.
Madamo suno sa iya sang nanari-sari nga kahiwatan nga ginpatigayon rason nga madamo man sang ginpilian ang mga tawo nga nagakabagay para sa ila edad kag interes kalakip ang mga cultural, sports, kag trade fair events.
Gindayaw man sini ang mga ‘events for a cause’ nga ginpatigayon kadungan sang amo nga selebrasyon.
Nagpasalamat man si Tesoro sa tanan nga mga ahensiya sang gobyerno kag mangin sa pribado nga mga organisasyon nga nagbulig agud matigayon ang nasambit nga selebrasyon.
