Ginapreparahan na sang Capiz Provincial Government ang nagahilapit nga Capiztahan 2026.
Sa interview sang Bombo Radyo kay Atty. Luvim Amores, Provincial Information Officer kag Concurrent Human Resource Management Officers, iya ginpahayag nga may yara sila sang konkreto nga plano para sa pagahiwaton nga different activities.
Gin-athag ni Atyy. Luvim nga indi sila mag-iban sang activities bangud kulang sila sa budget kundi part sang ila plano ang ginatawag nga budgeting.
Buot silingon, pagabahin-bahinon nila ang budget sa mga nakalinyada nga mga aktibidad nga pagahiwaton.
Samtang, suno naman kay Mr. Alphonsus Tesoro, head sang Provincial Tourism and Cultural Affairs, iya ginpahayag nga pagalimitahan ang mga magapartisipar sa Surambaw event nga pagahiwaton sa palaabuton nga Capiztahan 2026.
Dugang pa ni Tesoro, wala sang pagabag-ohon sa amo nga event, magluwas gid lamang sa paglimita sang mga partisipante, ini bangud agud mangin komportable kag mahatagan sang maayo nga feature ang nasambit nga Surambaw.
Pahayag pa ni Tesoro, ang importansiya sang surambaw agud ipakita ang manggad sang kadagatagan sa Probinsya sang Capiz nga ginakilala Seafood Capital of the Philippines.
Nahibaluan nga ang surambaw ang gina-organisa sang pribado nga organisasyon sang mga restaurant sa probinsya san Capiz nga sarang makaakomodar sang 600 ka mga partisipante kag may yara sang P999.00 per head nga bayad.
Ginpahayag man ni Mr. Rio Garcia, Local Ecomic and Investment Promotions Officer nga ang subong nga Capiztahan 2026 ang nakasentro sa pagkilala sa Local nga Produktong Capiznon.
Gina-engganyo man ni Garcia ang mga nagapartisipar nga business owner kag local producer nga magpasakop sa mga activities nga pagapatigayon sa palaabuton nga Capiztahan 2026.
Magasugod ang nasambit nga Capiztahan sa Abril 13 kun sa diin ginasaulog ang ika-125th foundation Anniversary sang Probinsya sang Capiz.
