Isa ka inspirado nga istorya sang paglaum, pagtuo kag pagpangabudlay ang ginpakita ni Ma. Jessa Ambag, isa ka 2025 Architecture Licensure Examination passer halin sa Capiz State University (CapSU)-Main Campus, matapos ang apat ka beses nga kapaslawan sa board exam.
Sa interview sang Bombo Radyo kay Ms. Ma. Jessa Ambag, ginpahayag sini, nga nagtapos sya sa CapSU sang tuig 2019, kag isa sya sa mga nagpakita sang tunay nga determinasyon sa pagtuman sang handum nga mangin arkitekto.
Dugang pa sini, ginpili niya ang kurso nga Architecture tungod nga gin-inspired siya sang ila simple nga payag nga balay — isa ka paandam sang iya pangandoy nga magpatindog sang mas maayo kag lig-on nga mga istruktura para sa masunod nga henerasyon.
Apang indi nangin mahapos ang iya dalan. Apat ka beses siya nga napaslawan sa board exam, kag gin-atubang niya ang madamo nga pagtilaw, lakip na ang kakulangan sa pinansyal nga suporta kag ang kalayo sang iya pamilya. Bisan pa sini, nagpadayon siya sa pagpangabudlay kag wala nagbiya sa iya handum.
Sa pihak nga wala pa siya nakapasar, nakatrabaho na siya sa iya field, kag nagapadayon sa pag-review samtang nagatrabaho. Self-review lang ang iya himo, ginpukaw niya ang iya kaugalingon sa pangamuyo kag pagtuon.
“Indi gid mag-untat. Maskin pila ka beses ka pa ma-fail, kuha lang nga kuha, kay maabot gid ang perfect timing para sa imo,” ang iya ginpabugal nga pahayag. Nadumduman man niya ang bilidhon nga laygay sang iya iloy nga nagtudlo sa iya nga, “Ang gin-umpisahan mo, tapuson mo.”
Isa ka memorable nga tinion ang pagbaton niya sang mensahe sang congratulations samtang nagacharge siya sang cellphone — ang moment nga nakahibalo siya nga sa ikalima nga kahigayunan, nakapasar na siya.
Nagpalab-ot man siya sang hugot nga pagpasalamat sa CapSU, sa tanan nga iya naging manunudlo, sa iya mga kauturan kag sa mga tawo nga wala nagbiya sa iya sa tunga sang kabudlayan.
Isa ka ehemplo si Ma. Jessa Ambag sang pagtuo sa kaugalingon, kabakod, kag paglaum — nga bisan pila pa ka beses ka mapaslawan, basta padayon kag may determinasyon, abot gid ang kadalag-an.
