ROXAS CITY – Nagsugod na sa pagbukas sang klase ang tanan nga Campuses sang Capiz State University (CAPSU) subong nga adlaw, Agosto 8.
Ini ang ginkumpirmar ni Dr. Editha C. Alfon, CAPSU President, sang mainterview sang Bombo Radyo.
Suno sa doktor,nagsugod na sa pagpreparar sang classrooms ang pila ka manunudlo kag naghiwat sang orientation program ilabi na sa freshmen kag transferees kun sa diin magadugay ini sumugod Agosto 8 tubtob 19.
Indi paman opisyal suno diri ang listahan sang mga enrollees apang ginabulubanta masobra ini sa 25,000 para sa S.Y 2022-2023.
Dugang pa ni Dr. Alfon, blended learning sa gihapon ang mangin sitwasyon ukon kombinasyon sang offline kag online ang mangin set-up sang klase bangud ini ang gin-implementar sang Commission on Higher Education (CHED).
Pahayag sang Presidente, prayoridad sa limited face-to-face class nga magasugod sa Agosto 22 ang mga hands-on subjects kasubong sang laboratory subject samtang magapabilin naman nga online ukon modular ang mga lecture subjects.
Sa pihak sini, pagatutukan sang nasambit nga unibersidad ang pag-obserbar sang minimum health protocols para sa mga estudyante kaangay sang pagmentinar sang social distancing kun sa diin 25 ka mga bangko lamang ang igabutang sa kada classroom (one seat apart) kag pagsuksok sang facemask.
Indi man sila mangin strikto sa pagsuksok sang uniporme kag pagpangita sang medical certificate ukon Philhealth card apang ginsiguro ni Dr. Alfon nga pasakdagon ang pagpabakuna sang mga estudyante agud malikaw ang mga ini sa balatian nga Covid.
Tinguhaan man nila suno diri nga amat-amat nga magbalik sa full classes, apang sa subong ginapangayo sini ang mahaba nga pasensya sang mga ginikanan kag estudyante bangud para man ini sa ila kaayuhan.
Nagapasalamat naman si Dr. Alfon sa nagasuporta sa ila pagbukas klase kag luyag sini ipalab-ot sa tanan ilabi na sa mga enrollees sang CAPSU nga mag-obserbar sa minimum health protocols, habaan ang pasensya kag magpangamuyo nga dalayon na nga madula ang Covid-19.
